Anine Aasen

Denne hausten kuraterer Kiosken den svarte veggen i foajeén – eit rom som bind saman kaféen og kunstrommet. Her møtest folk, et, pratar og deltek på arrangement – eit rom i stadig rørsle.

Til dette prosjektet har Kiosken invitert Anine Aasen, som har utvikla eit eige språk i måleria sine. Ved å setja kvardagslege objekt saman skapar ho scenario som utfordrar vår logiske måte å sjå på, men som samstundes plasserer oss i kjende miljø – eit kjøken, eit spisebord, eit vindauge. Med dristige fargar, teksturar og former opnar ho for nye forteljingar som kjennest både heimlege og framande.

Inspirert av Virginia Woolf si bok Bølgene, arbeider Aasen i ein tilstand av kontinuerleg dialog og eksperiment. Detaljar flyt inn i abstrakte former, og betraktaren blir invitert til å leike med eigen fantasi og historieforteljing.

Anine Aasen (f. 1992, Nesodden) er basert i Bergen og arbeider hovudsakleg med måleri. Ho kombinerer leiken bruk av farge og komposisjon med mønster og detaljar henta frå kvardagsobjekt, interiør og tekstil.
Referansar til kunstnarar som Henri Matisse og Henriette Grahnert bind saman det historiske og det moderne.
Aasen har studert ved Hochschule für Grafik und Buchkunst i Leipzig og Kunstakademiet i Bergen (KMD), der ho tok mastergrad i 2024.
Ho har stilt ut mellom anna på Landsforeningen Norske Malere i Oslo, og er representert av Høyersten Contemporary i Bergen.

Kiosken er eit tverrfagleg prosjektrom og butikk i Bergen, etablert i 2018 for å støtta regionale kunstnarar og designarar. I dag blir Kiosken driven av Daniela Ramos Arias, Siv Støldal, Ann-Kristin Stølan og Stine Aas.

Gjennom utstillingar, residencyprogram og rettleiing for kunstnarar og publikum fungerer Kiosken som eit fellesskap for eksperimentell praksis som kryssar grensene mellom kunst, design og handverk.

Støtta av: Bergen kommune, Vestland fylkeskommune, Norske Kunsthåndverkere og Kulturdirektoratet.

Les meir:
👉 Nettstaden til Aasen
👉 kiosken.studio