Arkiv

Seinhaustens utstilling er sett saman av delar:
Exsiccatae – eit verk av Ine Harrang, (1960-) kunstnar frå Molde
Ei samling lav og mose frå Johan Havås (1864 – 1956), botanikar og lavforskar frå Granvin
Akvarellar av Torkel Lillefosse (1868–1946), botanikar og plantemålar frå Strandebarm

Utstillinga er ei hylling til verdien i detaljar og den stille utforskinga av naturen me er del av.

Kuratert av Sissel Lillebostad

Ingrid Pasmans er biletkunstnar og bur og arbeider i Amsterdam. I august og september 2018 hadde Pasmans opphald som kunstnar på KHMessen i Ålvik. Naturen i Hardanger blei veldig inspirerande for henne. Pasmans laga i perioden eit Hardanger Herbarium; plantar, blad, blomar og tang funne i Hardanger, tørka mellom arka i eit gammalt norsk leksikon. Ho brukte plantar frå Hardanger til kunstverka; to 2,5 meter høge akvarellar av viltvaksande plantar og ein installasjon av fliser av porselen. Hardanger Herbarium er å sjå i foajeen.

Ingrid Pasmans sitt arbeid er sett saman av teikningar, akvarellar og porselen, i tillegg til prosjekt for det offentlege rom. Opplevinga av natur og historie er ei viktig inspirasjonskjelde. Verka ber preg av ei viss skjørheit, og materiala som vert brukt er ofte arbeidskrevjande. I tillegg til å arbeide i sitt eige atelier, underviser ho på Rijksmuseum og Hermitage Museum Amsterdam, og ho arbeider med sosiale kunstprosjekt.

Kabuso er stolte over å presentere soloutstilling med Sandra Vaka. Verka hennar spring ofte ut frå fotografiet, anten ho arbeider med egne bilder eller funne materiale som ho omorganiserar. I denne utstillinga viser Vaka fotografiske arbeid og ein ny skulpturserie i glas.
Biletserien Jugs kretsar kring temaet vatn. Det er foto av vatn på vatn. Kunstnaren har måla omriss av mugger (jugs) med vatn på ein dataskjerm, for så å fotografera skjermen med eit analogt kamera. Vassdråpane blir som ei linse og bryt lyset og forstørrar pikslane på skjermen. Slik peikar verket tilbake på fotomediet og avdekker koplingar mellom natur og teknologi. Mugger (jugs) kan vera vulgær slang for kvinnebryst, men vasskanna kan óg betraktast som eit symbol for liv, sjenerøsitet og historisk sett – for grådigheit. Glasskulpturane i utstillinga liknar vasskanner, med hank og form og proporsjonar til ei kanne utan opningar. Skulpturen blir forvridd og, i praktisk forstand, ubrukeleg.

Forskarar har i fleire år hevda vi er inne i ein ny geologisk tidsalder, forårsaka av menneskeleg aktivitet på jorda. Til tross for ei overveldande bevismengd er forholdet mellom enkeltindividets ansvar og globale endringar nesten umogeleg å fatte. Dei ulike verka har titlar frå brus og annan leskedrikk, som til dømes Jugs (fanta) og Jugs (blueberry blast kool-aid). Dei fargerike, våte bildeta er estetisk behagelige abstraksjonar, men når ein studerar

dei nærare får ein auge på at motiva bakanfor vasskanna er av oljeutslepp, flom og andre naturøydeleggingar, og det blir nærliggande å stille spørsmål ved vår eiga rolle i klimaregnskapet.

Sandra Vaka (f. 1980). har hatt soloutstillingar på stadar som NoPlace (2017), Kunstnerforbundet (2017), Melk (2016), Rogaland Kunstsenter (2015) og Frankfurt Am Main (2015). Ho har også delteke på ei rekke gruppeutstillingar i inn- og utland, eksempelvis KINDL – Zentrum für zeitgenössische Kunst (2018), House of Ergon (2018), Kunsthall Oslo (2017), Centro Nacional de las Artes (CENART) (2017), Island Oslo (2017) WILDLIFE Sculpture Park (2017), Vestfossen Kunstlaboratorium (2017) Stavanger Kunstmuseum (2017), Kunstvirein Nürnberg (2016), Kunstnernes Hus (2016) og Lillehammer Kunstmuseum (2016). Hun deltok på Forbundet Frie Fotografers Vårutstillingen i 2017, kor ho også vart tildelt Fotokunstprisen. Til neste år vil ho ferdigstille ein permanent offentlig skulptur i Hovidbekken i Oslo, bestilt av kulturetaten i Oslo kommune.
Vaka har ein mastergrad i kunst fra Det Kongelige Danske Kunstakademi og ein bachelorgrad frå Kunsthøgskulen i Oslo. Ho bur og arbeidar i Berlin og Stavanger.

7.juni – 21.oktober 2018 visar Kabuso «Broderte Pikslar» av Kristin Lindberg. Kunstverket består av 26 handbroderte kvadratar, 40 cm x 40 cm, og er montert i foajeen.
Tekstilane er brodert i samarbeid med ei gruppe kvinner på Sri Lanka. Lindberg har arbeid i lag med dei sidan 2014, med produksjon av fleire av hennar store, broderte kunstverk. Lindberg oppdaga tidleg at dei delte same broderiteknikk. Det me kjenner frå eigen tradisjon, Selburosa, er og ein del av tradisjonen på Sri Lanka. Der går forma under namnet åttebladlotus og er del av tradisjonell tekstildekor. For Lindberg har dette samarbeidet blitt svært meiningsfylt, for som ho seier: Eg får drive med kunst og samstundes løne ti kvinner som kan brødfø sin familie.
I installasjonen «Broderte Pikslar» søkjer Lindberg å minimere virkemidlane til nokre få typar sting, brodert på tre ulikt farga tekstil. Dei forskjellige underlagsfargane skimrar gjennom den tett broderte overflata, noko som tilfører dei monokrome flatene subtile fargespill. At kvadratane er brodert av fleire gir dei og ulik framtoning, med overraskande stor variasjon.
Lindberg er født 1950 i Oslo, og blei uteksaminerte frå Kunsthøyskolen i Oslo 1973. Ho arbeider i ulike kunstuttrykk som foto og installasjon med hovudvekt på tekstil og har blant anna blitt karakterisert som fornyar av norsk åkletradisjon.

02.06-26.08: Felieke van der Leest – Frå Spermheart til Miss Universe

Denne famillievenlege utstillinga i Kabuso tek deg med inn i eit univers med mange fascinerande skapningar. Kanskje blir du også inspirert til å laga din eigen smykkekunst på verkstaden vår?
Felieke van der Leest skapar iaugefallande smykke satt saman av edelmetall, tråd, plastdyr og tekstile teknikkar. Smykka ber på eigne historier og kan sjåast som skarpe observasjonar med mykje humor bygt inn.
Sommarens utstilling i Kabuso er via hennar kunstnarskap i heilskap og presenterer hennar særeigne uttrykk utvikla gjennom dei siste 20 åra.
Smykka til van der Leest er rike på detaljar. Dei er forteljande smykke som og fungerer som miniatyrskulpturar. Klede og tilbehør gir leikedyra ny identitet og menneskelege trekk. Smykka vert først opplevd som humoristiske med sine uventa kombinasjonar, men i fleire av smykka ligg det og eit alvor under. Menneskeleg dårskap vert tematisert og latterleggjort, og tema som krig, miljø og dyrevelferd er kritisk antyda.
Felieke van der Leest (f. 1968) kjem frå Emmen i Nederland, men har vore busett i Øystese sidan 2008. Ho er representert i fleire internasjonale samlingar som Victoria & Albert Museum, London og Cooper Hewitt museum, New York og sel smykke i Tokyo, New York og Amsterdam.
Denne sommaren stiller kunstnaren ut på den nye heimstaden sin.

Lys, fargar, transparens, tid, nerve og kartografi er komponentar Trudi Jaeger går i dialog med og abstraherer. Utstillinga QUARTUS Illuminations – Atlas Littoralis består av måleri og arkitektoniske grep i utstillingsrommet i Kabuso.

Trudi Jaeger jobbar stadsrelatert med maleri og teikning som ofte har utspring i sårbare områder som rører ved henne, slik som den unike kystfloraen på Vestlandet, som har måtta tilpassa seg dei harde omgjevnadene. Lys fargar, transparens, tid, nerve og kartografi er komponentar ho går i dialog med og abstraherer. Hennar prosess kan sjåast i samanheng med action painting, der konsentrert nærvære som meditativ performance, fullstendig ro og konsentrasjon er essensielt. Utstillinga ‘QUARTUS Illuminations – Atlas Littoralis’ vil bestå av maleri og arkitektoniske grep for å relatere dei romlege spenningane i arbeida til utstillingsrommet i Kabuso.

Utstillinga vert kuratert av Randi Grov Berger og inngår i Vestlandsutstillingen 2018 (VU18), ei annleis utgåve av den tradisjonelle landsdelsutstillinga.
VU18 består av seks separatutstillingar, og inkluderer visningsstadane Kunsthuset Kabuso, Sogn og Fjordane Kunstmuseum i samarbeid med Sunnfjord Kunstlag, Haugesund Billedgalleri i samarbeid med Haugesund Kunstforening, Jugendstilsenteret og KUBE, Entrée og Kunsthall Stavanger.

VU18 presenterer kunstnarane Ragnhild Aamås, Magnhild Øen Nordahl, Trudi Jaeger, Eivind Egeland, Karen Skog og kunstnarduoen Blomgren & Skuladottir, som samla utgjer ein breidde i det som skjer på den vestlandske kunstscena.

Vinteren 2018 syner Ragna Bley (f.1986) utstillinga Zooid i Kabuso. Utstillinga består av ein serie store måleri på ubehandla seglduk og ei rekkje små bronseskulpturar sett saman til ein heilskap.
Måleria er tre meter høge og abstrakte i uttrykket. Uttynna akrylmåling på den kvite seglduken får fargane til å flyta ut og over i kvarandre på ein måte som minner om akvarell. I bileta trer det fram organiske og svevande formar som vert gjentekne i dei bitte små, knudrete bronsefigurane ein finn på golvet. Zooid er eit omgrep henta frå naturvitskapen og viser til dyr eller organismar som er del av ein større koloni, som til dømes algar og korallar. Elementa i utstillinga framstår og som ein heilskap, ein totalinstallasjon.
Ragna Bley er fødd i Uppsala i Sverige, men bur og arbeider i Oslo. Ho er utdanna ved Kunstakademiet i Oslo og Royal College of Art i London. Bley har fått internasjonal merksemd og har stilt ut i mellom anna Hamburg, London og New York. Utstillinga Zooid har tidligare vore vist på Munchmuseet i bevegelse – Kunsthall Oslo.

Sjå gjerne www.ragnabley.com

Den brasilianske kunstnaren Maria Nepomuceno (1976-) lagar fargerike skulpturar med kjende og overraskande material. Tau er det gjennomgåande materialet. Saman med perler, fletta strå, keramiske element med meir, skapar ho skulpturar som til dømes kan minna om levande vesen eller undersjøiske planter. Spiralforma går igjen og skulpturane endrar seg i møte med rommet dei vert stilt ut i.
Nepomuceno let seg inspirera av urfolket i Brasil sine handverkstradisjonar og fleire av verka vert til i eit kollektivt fellesskap. Tittelen på utstillinga, Afetosyntesis er sett saman av det portugisiske ordet afeto, som tyder hengivenheit eller kjærleik, og syntesis som tyder syntese eller foreining. Nyordet er inspirert av omgrepet fotosyntese, som skildrar korleis planter produserer livsnødvendig oksygen. Nepomuceno viser til kor viktig kjærleiken òg er for menneska – gjennom kunstverk som opnar for sanselege opplevingar.

Utstillinga er produsert av Stavanger kunstmuseum

Gustav Metzger (1926-2017) var ein pioner innan aktivistisk kunst. Utstillinga i Kabuso syner eit stort utval måleri og teikningar frå 1950-talet – the table series. Dette er fyrste gong eit større utval arbeid frå denne perioden vert stilt ut samla.
Bileta er ekspressive og førestiller bord, men kan og minne om soppskyer frå hydrogenbomber. I 1959 gjekk Metzger heilt vekk frå måleriet og byrja laga kunst av kvardagslege objekt og med industrielle material. Metzger sitt samfunnsengasjement kjem tydeleg til uttrykk gjennom installasjonane Mirror Trees og Mass Media: Today and Yesterday som tek plass i utstillinga.
I fleire tiår har Metzger vore ein del av undergrunnsmiljøet i London og har dei seinare åra hatt stor innverknad på yngre generasjonar kunstnarar. Miljørørsla har hatt ei sentral rolle i kunstnarskapen hans, kor han har tematisert klimaendringar og økologisk øydelegging i fleire verk og større prosjekt. Korleis massemedia har formidla samfunnsutfordringar har oppteke Metzger i sterk grad og gjør han til ein relevant kunstnar for vår eiga tid. Mass Media: Today and Yesterday oppmoder publikum om å sjå nærare på dagsavisene med eit kritisk og granskande blikk. 10 000 lokalaviser frå Hordalandsregionen utgjør kjernen i verket. Mirror Trees er tre utan greiner og blad, vend opp ned og støypt i betong med røtene veivande i lufta. Verket speglar brutaliteten menneska i vår tid utøvar mot naturen. Det er ikkje tilfeldig at Metzger stiller ut i Hardanger, ein region som dei seinare åra har vore sterk knytt til miljøaktivisme.
Metzger er og kjend for å ha skapt sjangrane auto-destructive art (sjølvøydeleggande kunst) og auto-creative art, som vert ståande som referansepunkt i moderne kunsthistorie. Gjennom bruk av syre på nylon laga han kunstverk som stod for si eiga øydelegging og samstundes fortsette ein kreative prosess utan kunstnaren sin medverknad. På slutten av 1970-talet tok han initiativ til kunstnarstreikar i protest mot ei stadig meir kommersialisert kunstverd. Dei siste åra hadde han fleire større utstillingar, mellom anna ei retrospektiv utstilling på Serpentine Gallery i London i 2009 og han vart via stor plass under dOCUMENTA(13) i Kassel. I 2015 kunne ein for fyrste gong sjå Metzger sine verk i Noreg på Kunstnernes Hus og i Kunsthall Oslo, kor fleire sjølvøydeleggande verk vart gjenskapa. Metzger vart fødd i Nürnberg i Tyskland, men kom 13 år gamal saman med broren til England som jødisk flyktning.

Utstillinga er kuratert av Kabuso, saman med Leanne Dmyterko ved Gustav Metzger studio og Synnøve Marie Vik.

Korleis opplever ein Ingebrigt Vik sine skulpturar i dag? Kan ein sjå Vik sine kunstverk på nye måtar gjennom samtidskunst? 150-årsjubileet for Ingebrigt Vik sin fødsel vert opna med utstillinga Ingebrigt Vik 150. Ingebrigt Vik og Bård Breivik. Utstillinga undersøker fellestrekk ved dei to skulptørane sine kunstnerskap.
Ingebrigt Vik (1867-1927) vart fødd i Øystese i 1867 og vart i si levetid ein av dei leiande bilethoggarane i Noreg med høgdepunkt som monumentet over Edvard Grieg og Ynglingen. Vik var ein meister i år skildre sinnsstemningar og livsfasar, men og ein meisterleg formidlar av menneskekroppen sin heilskap. Gammel kone og Sittende jente er døme på kor gjennomarbeidd skulpturane var i alle ledd.
Bård Breivik (1948-2016) har gjennom førti år hatt ein framståande posisjon i skandinavisk kunst. Han vart fødd og vaks opp på Laksevåg i Bergen, men reiste mykje og produserte kunstverka sine i land som Kina, Brasil og Kenya. 72 arbeid frå Partitur for en lengre samtale tar del i utstillinga saman med andre karakteristiske verk.
I Ingebrigt Vik museum viser me samstundes Annette Koefoed – Imago

Spektakulær teiknefilmeventyr med trollmenn, krig og kjærleik. Om den unge jenta Sophie, som vert forheksa til ei gamal dame og virvlast inn i eit eventyr med ein ung, kjekk trollmann, ei tjukk hekst, ein elddemon, ein kortpusta hund – og ikkje minst; eit omstreifande, levande slott.

Lengd: 2 timar.
Papir og blyantar ligg klare på teiknebordet etter filmen.

Om Bornas Kabuso:
Kunst- og filmklubben er eit månadleg tilbod til born i Kabuso.
Medlemsskap i klubben kostar 70 kroner per barn og gir gratis inngang til alle arrangementa våren 2019.
Vaksne går gratis i følge med born. Inga aldersgrense, inga påmelding. Passar for alle.

2019 Bornas Kabuso plakat

Lat deg sjarmera av unge talent frå Kvam kulturskule!

Fire gongar i året byr kulturskulen inn til konsert i konsertsalen i Kabuso.
Då kan du lena deg tilbake og oppleva alt frå vakker song til den råaste gitarsoloen. Du vil garantert bli både imponert, rørt og sjarmert – kakaokonsertane byr alltid på gode overraskingar.

Før og etter konserten kan du gjerne nyta kafélivet hos oss – sjølvsagt med mellom anna varm kakao på menyen.

Billettar, i resepsjon: 50,- (born/vaksen)
NB! Kabusokortet gjeld ikkje på kakaokonsertar

Arr: Kvam kulturskule og Kabuso

Populært konsept har nådd Øystese! Amatørar, uerfarne og proffar – de er alle velkomne til denne uformelle teikneøkta under retteiing av illustratør Marijke Strømmen. Utforsk teikninga sine mogelegheiter medan du tek deg eit glas øl eller vin, eller saft i ei uformell og kreativ atmosfære.

Få og med deg ei unik visning av skisser og teikningar av Ingebrigt Vik(1867-1927) etter teikneseansen.

Utstillinga Aud Bækkelund – Alternative farvann vil og vere open og inkludert i billetten.

Kr 150,- inkludert eit glass med valfri drikke (øl, vin, eplemost, mineralvatn, kaffi eller te)
Billettar i døra.

PROGRAM FOR VÅREN:

2019 Kunstbar mars plakat

Høyrt om gratistorsdag i Kabuso? Kvar første torsdag i månaden kan du oppleva utstillingane på utan å tenkja på inngangsbillett.

Aktuelle utstillingar for gratistorsdagane 7. mars og 4. april:
Aud Bækkelund (hovudutstilling)
Kirsti van Hoegee (foajéutstilling)
Hardanger Skyspace (utan lysprogram – eigne tider/billett for dette)
Ingebrigt Vik museum

I denne verkstaden skal me måla på papptallerkar og gjera dei om til dyr og dyrefjes. Lag di eiga dyremaske. Kanskje skal den vera skummel eller søt. Du bestemmer. I filmkroken får de høyra og sjå eventyr fortald av Odd Børretzen. Drop innom mellom 12 og 14 for ei hyggeleg stund i Kabuso.

Bornas Kabuso: kunst- og filmklubb er eit månadleg tilbod til born i Kabuso. Medlemsskap i klubben kostar 70 kroner per barn og gir gratis inngang til alle arrangementa våren 2019. Vaksne går gratis i følge med born. Inga aldersgrense, inga påmelding. Passar for alle.

2019 Bornas Kabuso plakat

Botanikk er tema for årets fyrste Kunstbar. I ei uformell atmosfære får du innblikk i ei verd av plantar og kunst.

Inngang: 150 kroner (inkluderer eit glas valfri drikke: vin, øl, eplesaft, kakao, mineralvatn, kaffi eller te).

Program
– Miniforedrag ved fagleg leiar Sissel Lillebostad: Botanikken i kunsten.
– Planterelatert Kahoot.
– Unik visning av eit av Torkel Lillefosse sine herbarium
– Open utstilling: Harrang/Havaas/Lillefosse

Sosialt samvære.

Velkommen til relansering av Kunstbar i Kabuso. Kvar månad vil eit nytt tema verta presentert. Temaet relaterer seg til utstillingar og andre aktuelle tema i Kabuso. Kunstbar har som mål å vere ein møtestad for deg og meg.