Karbonhjarte

01.11-04.01 2026

Utstillinga KARBONHJARTE søkjer å gi poetiske uttrykk for karbonet sine uransakelege vegar med vekt på grafiske metodar. Utstillinga er sett saman av individuelle verk av Erika Reed og Daniel Persson og den kollektive produksjonen av tre objekt; ein bokrull, ei trekkspelbok og ein serie kart.

Erika Reed har tidlegare arbeidd som brannkonstabel. Erfaringar og reiskapar herifrå nyttar ho i kunstverka som også er inspirert av skogbrannar og menneska sine inngrep i naturen. Motiva i trykkplatene har kunstnaren skapt med motorsag, øks og eld.

Daniel Persson har lang erfaring med grafikk og fotografi.  I biletserien Samfärdsel er det grunnstoffet karbon som former dei fotografiske motiva. Me ser veglys, plankestubbar, skitne glasruter og papirklipp. Ting og situasjonar me gjerne oppfattar som bagatellar i omgivnadene men fullt ein stor del av både den indre og ytre kvardagen vår.

KARBONHJARTE har sine røter i grafikkprosjektet Trykk i sanntid organisert av kunstnarane Kjellaug Hatlen Lunde, Åse Anda og Rita Marhaug. I fem år deltok til saman 64 kunstnarar i prosjektet der føremålet var å binde saman ti grafikkverkstadar gjennom å lage fem felles kunstverk. Trykk i sanntid har så langt også resultert i seks ulike utstillingar: Karbonavtrykk, Karbonfangst, Karbonlagring, Karbonsyklus, Karbonpuls og no KARBONHJARTE.

Titlane er kjente omgrep med sentral plass i miljø- og klimadebatten. Dei knyter seg til problemstillingar som også gjeld vår eigen praksis som kunstnarar, -ofte med stor reiseaktivitet og trong til lagring av store mengder digital informasjon, begge deler energikrevjande.  Slik skriv kunstnaren –som folk flest, seg inn i den karbondrivne økonomien sitt krinslaup.

Karbon i rein form kan vere både kol/sot, grafitt og diamant. Dessutan inngår det i stjernestøv (silisiumkarbid), som vert danna i dei såkalla karbonstjernene.

Utstillinga er støtta av Kunstsentrene i Norge (KiN) og Norsk kulturråd

Trykk i sanntid er støtta av:
Norsk kulturråd
Billedkunstnerne vederlagsfond
Norske grafikere
Nordland fylkeskommune