Kva skjer i Kabuso?

NB! Merk at filmen av Leande Djønne vil vera utilgjengeleg delar av dagen fredag 20/8 og sundag 22/8. Dette grunna arrangement i konsertsalen.

«Styrlause prosessar» er eit samarbeid mellom Nordisk Kunstnarsenter Dale, (NKD) og Kunsthuset Kabuso. Prosjektet er sett saman av to utstillingar på Kabuso, 2020 og 2021, og eit tre månader langt arbeidsopphald på NKD, Dalsåsen, sommaren 2020. 

Kunstnarane som deltek er Cecilia Jonsson, Pierre Lionel Matte, Ingri Haraldsen, Leander Djønne og ein forfattar; Tora Sanden Døskeland.
Kurator for utstillingane er Sissel Lillebostad, Kabuso, i samarbeid med Arild H. Eriksen, NKD.

Om kunstnarane:

Leander Djønne (1981) har ein produksjon som omfattar skulptur, film og dikt, med utstillingar på UKS Oslo, Landings, EL Parche Bogota, Astrup Fearnley Museum og Hannover Kunstverein. Djønne er utdanna ved Kunstakademia i Oslo, Bergen og Malmö, samt Staedelschüle Frankfurt am Main.

Tora Sanden Døskeland (1992) er utdanna ved Universitetet i København og Skrivekunstakademiet i Bergen. Diktsamlinga Behold meg kom ut på Oktober forlag 2018. 

Ingri Haraldsen (1984) er utdanna ved Høgskolen i Oslo og det Baskiske Universitet, Bilbao, Spania. Ho har stilt ut på QB Gallery Kunstnerforbundet, Tekningmuseet i Laholm Kronica Museum og The Armory Show, NY.

Cecilia Jonsson (1980) er utdanna ved Bergen Kunst og designhøgskole og det nordiske lydkunst programmet. Hennar kunstnarlege arbeid visast internasjonalt og har motteke ein rekke prisar, blant anna COAL Art and Environmental Prize og Prix Ars Electronica. 

Pierre Lionel Matte (1961) har bak seg studieopphald i Polen, Chile og Bolivia i tillegg til Kunstakademiet i Trondheim. Han arbeider idébasert innan dei fleste medier. Dei siste åra har Matte stilt ut på Kunstnerforbundet, Oslo, IKM/OM Oslo, European Rorschach test part II, Kunstbanken og Tegnetriennalen i Oslo.

Foto: Katrine van Tulder
Foto, øverst: Aukse Drungiliene

Haustens første Bornas Kabuso er ein drop-in verkstad med temaet hausttrykk.

Om hausten er skogen full av spanande vokster. I denne kreative verkstaden skal me bruka sopp, haustlauv og andre gjenstandar ein kan finna i skogen til å trykka med. Resultatet vert flotte former og overraskande mønster.
Kortfilmar i filmkroken.

Bornas Kabuso er ein kunst- og filmklubb for alle born med kring 4 arrangement i halvåret.
Medlemsskap kostar 70 kroner, som gir gratis inngang til alle arrangementa i klubben.
Her viser me mellom anna animasjonsfilm og byr på kreative verkstadar.

HEIDI LAMBACH vokal, fløyte, piano 
OLE MARIUS SANDBERG kontrabass 
THOMAS DAHL gitarer  

Den bergensbaserte artisten Heidi Lambach er klar med lansering av sitt nyaste album «Hjerter Som Vil». Med seg har ho eminente jazz- og popmusikarar frå det vidkjende Voksne Herrers Orkester.

Her får du høyra vakre, nye viser med tekst og formidling og delikat musikalitet i sentrum, ispedd ein god dose inspirasjon frå folk, jazz og pop.

Heidi har dei siste åra etablert seg som ein varm, ekte og nær formidlar, med gode tekstar og fengande melodiar som løftar og inspirerer eit lyttande publikum. Ho har turnert i store delar av Sør- Noreg både som soloartist og i diverse konstellasjonar. I tillegg til den nye musikken, lovar hun leikande, levande og nære versjonar av fleire klassiske jazzballader denne haustkvelden i september.

Varigheit: Kl 19-20.30 inkludert pause
Billettar: Kr 250,- (under)

Konserten er støtta av Kulturrådet ved Norsk Kulturfond, Fond For Utøvende Kunstnere og Bergen Kommune.

Alle innehavere av ledsagerbevis for funksjonshemmede får gratis billett for sin ledsagar (må bestillast via Ticketco)

Erik Lukashaugen – akustisk gitar, song
Tarjei Nysted – fele, nøkkelharpe, mandolin m.m.

Erik Lukashaugen sine særeigne og jordnære viser har røter på Finnskogen. Dei fann form i møte med Hans Børli sin lyrikk på debutalbumet «Av en sliters memoarer» i 2013.
Albumet vart hylla av kritikarane og visesongaren vart tildelt Vidar Sandbecks kulturpris Regnbågåbrua.
Fem år og meir enn fem hundre konsertar seinere slapp Lukashaugen Børli-albumet «Vi eier skogene» i 2018.
Utgjevinga vart svært godt mottatt og nominert til Spellemannsprisen. I haust er han aktuell med sitt 5. album, Det vi rakk.

Til Kabuso kjem Erik Lukashaugen og Tarjei Nysted med ein sekk full av Børli-viser, samt høgdepunkt frå visesongaren sin øvrige katalog, inkludert radiosingelen «Min sønn» og «Skogblues», skriven saman med rockepoet Tom Roger Aadland.

Velkomen til ei stemningsfull og humørfylt musikalsk reise langt inn i skogen

Helgekurs i aktteikning på Kabuso i Hardanger hausten 2021!

I dette kurset får du høve til å teikna etter aktmodell. Å teikna etter levande modell er ei fantastisk, lærerik og utfordrande oppleving, som har vore ein sentral del av kunstutdanninga gjennom tidene. Målet er å undersøka kroppens haldningar og rørsler. Kurset er lagt opp som ein kombinasjon av teori og korte og lengre teikneøkter. Du får vegleiing og korrektur tilpassa ditt nivå.

Målgruppe: Alle. Nybyrjarar og erfarne teiknarar.
Instruktør: Marijke Strømmen.

Pris: 2800,-/3825,-*
*inkludert overnatting i enkeltrom med frukost på Hardangerfjord hotel

Lunsj, drikke og snacks er inkludert i prisen begge dagar.
Ta med papir og teiknesaker. Kan tingast ved påmelding for 350,-

Påmelding: karen@kabuso.no innan 17. september

>>> Sjå kursprogram for Hardanger og Voss museum pr. januar 2021

Sundagkveld med Jorun Marie Kvernberg & co i Kabuso – hald av 3. oktober for desse fire jazz- og folkemusikarane!

Perleskum er:
Jorun Marie Kvernberg (fele, hardingfele, song, komponist)
Unni Boksasp (folkesong, harpeleik)
Lars Andreas Haug (tuba)
Dag-Filip Roaldsnes (piano)

To folkemusikarar og to jazzmusikarar leikar seg med nye tonar til Vinje sine evig unge ord, og har med seg eit spildrande nytt album. Tuba-virtuosen Lars Andreas Haug ertar den kvikke nordmørs-stemma Unni Boksasp opp i nye høgder. På svarte og kvite loddar Dag-Filip Roaldsnes djupet, medan komponist og felespelar Jorun Marie Kvernberg auser på og opp og fram med boge og streng.

Dei ettertrakta musikarane har kvar for seg og i ulike konstellasjonar mangfaldige plateutgjevingar, fleire Spellemannprisar og ei imponerande merittliste.

Perleskum spring ut frå tingingsverket «På geitevis», som var tinga av Førdefestivalen 2018.

>>> Sjå nettsida for Perleskum
>>> Perleskum på Spotify

Velkomen til opning av haustens utstilling i Kabuso – laurdag 9. oktober kl 14!
Verk av Aleksi Wildhagen, Patrik Entian og Jens Hamran.

Open kafé

Foto, Kabuso: Frå prosessen kor Øystesebygda er teken i bruk

I oktober er Hardanger på noko av sitt vakraste. Bli med kunstnar Wim van den Toorn ut i naturen med teikneblyant og blokk!

På dette kurset skal ein jobba med teikning i friluft. Å arbeida med friluftsteikning har lang tradisjon i kunsthistoria som til dømes i impresjonismen og nasjonalromantikken. Eksperimentering, undring og sansing står sentralt i arbeidsmetodane me skal utforska. Kurset vil vera ein kombinasjon av kreativ praksis ute i naturen, dialog og forelesingar om temaa kunst og natur.

Målgruppe: Alle. Nybyrjarar og erfarne teiknarar.
Instruktør: Wim van den Toorn.

Pris: 3500,-/4525,-*
*inkludert overnatting i enkeltrom med frukost på Hardangerfjord hotel
Lunsj, drikke,snacks og middag laurdag er inkludert i prisen.

Ta med papir og teiknesaker. Kan tingast ved påmelding for 350,-

Påmelding og spørsmål: karen@kabuso.no
Påmeldingsfrist 1. oktober

Sigrid Moldestad og det framifrå bandet hennar inntek scenen i Kabuso laurdag 16. oktober!

Sigbjørn Apeland: trøorgel, rhodes, piano
Jørgen Sandvik: gitarar, banjo, mandolin
Anders Bitustøyl: bass
Kåre Opheim: trommer
Roald Kaldestad: gitarar, mandolin

Sigrid Moldestad er norsk folkemusikar, sangar, låtskrivar, skodespelar og tekstforfattar. Ho vart kåra til Årets Folkemusiker i 2010 og debuterte som soloartist i 2007 med plata “Taus”som ho fekk Spellemannsprisen for.  Albumet henta musikk og inspirasjon frå 150 år gamle historier om dei mange kvinnene som spelte fele i Nordfjord, der ho vaks opp. Eit tema ho har jobba med i ulike uttrykk, både på scene, plate og konsertar. Songen “Samuline” vart kåra til årets låt i NRK Sogn og Fjordane i 2007 og var dedikert ei av desse spelkvinnene Samuline Seljeset (1804-1872).

Ho har gitt ut 6 soloalbum. Ho skriv tekstar sjølv, men har også tonesett diktarar som t.d Jakob Sande (“Eg ser inn i augo dine”), Tove Ditlevsen “ Så tag mitt hjerte”) og ikkje minst plata “Brevet til kjærleiken” med 11 dikt av Jan-Magnus Bruheim. Denne plata vart kåra til årets album uansett genre i NRK P1, “Norsk på Norsk”. Ho har samarbeidd med produsentane Yngve Leidulv Sætre, Kato Ådland og Morten Skage om platene ho har gitt ut.

Bandet ho spelar med har vore stabilt gjennom fleire år og ho og bandet er kjent for sine sterke konsertar og liveopptredenar. Ho har spelt på rockefestivalar, jazzfestivalar, folkemusikkfestivalar og countryfestivalar. Musikken hennar kjennest grenselaus og har teke til seg impulsar frå ulike genrar. Ho har også hatt sterke samarbeid med kammerorkesteret Ensemble Allegria og KORK, i tillegg til fast gjesteopptreden i Linda Eide sitt “Melodi Grand Jazz”.

Framsyninga «RIT» har fått namn etter etter Olav H. Hauge sitt dikt «Rit», som er eit gamalt ord for «å skriva». 

RIT er forma som ein monolog som vekslar mellom resitasjon, forteljing og song. Komponist, tekstutviklar, musikarar og sceneinstruktør samarbeider tett i denne produksjonen om å utforska Hauge sitt draumelandskap gjennom ein årssyklus. Målet er å føra publikum inn i tankar, kjensler og rom dei ikkje har gjesta tidlegare. Eit rom som freistar søkja lyden av det indre liv, der også stille er eit ynskje om endring. RIT teiknar ei utvikling med moment av humor, drama, angst, men også ei ro som byr på opnenheit, refleksjon, meditasjon og ei større oppleving av Hauge sin poesi. 

Innleiing: Katherine Jane Hanson
Song og resitasjon: Reidun Horvei
Piano og elektronikk: Inger-Kristine Riber 

Medverkande:
Songaren Reidun Horvei har i ei årrekkje arbeidd som frilans sopran og folkesongar. Ho har hatt konsert turnéar over store deler av Noreg med særskilde program for Rikskonsertane innan klassisk musikk til ny musikk, vise og folkemusikk. Horvei har sidan 1992 arbeidd som fylkeskvedar i Hordaland/Vestland. 

Pianist og komponist Inger-Kristine Riber utdanna ved Universitetet i Oslo, Norges Musikkhøgskole og Hochschule Für Musik, Theater und Medien Hannover (Tyskland). 

Katherine Hanson tok si doktorgrad på Olav H. Hauge med avhandlinga “Nature Imagery in Olav H. Hauge’s Poetry” (Department of Scandinavian Languages and Literature). Hanson har undervist på St. Olaf College, Pacific Lutheran University og seinast the University of Washington der ho er Affiliate Associate Professor. 

Thomas Pihl er ein kunstnar som hentar fargane sine ved å leggja lag på lag med måling. I Pihls verk er sjølve måleriet attraksjonssenteret, eit vindauga til ei verd som er udefinert, men estetisk tiltalande, og som refererer til skjulte tydingar. Måleriet er eit objekt, men materialiserer i seg sjølv mening og ettertanke.   

Skodespelar og regissør Ragnhild M. Gudbrandsen kjend frå teater og filmproduksjonar, i tillegg som regissør på ei rekkje oppsetjingar. Ragnhild Gudbrandsen er fast skodespelar ved Den Nationale Scene i Bergen, og har sterk tilknytning til Det Vestnorske Teateret. 

Tekst: Olav H. Hauge
Manus: Reidun Horvei og Katherine J. Hanson Musikk: Inger-Kristine Riber 

MARIUS KLOVNING gitar
HANS HULBÆKMO trommer
HANNA PAULSBERG saksofon
BÁRÐUR REINERT POULSEN kontrabass

Flukten vart til under den mykje omtalte nedstenginga i mars 2020. Dei fire musikarane møttest vekentleg og laga sin eigen musikalske fristad med ein einaste agenda; å skapa musikk saman der og då. Resultatet vart eit kruttsterkt heksebrygg som boblar over av speleglede og leikenheit.

Blant Flukten sine inspirasjonskjelder kan velkjente navn som Paul Motian, Joe Lovano og Bill Frisell nemnast, men bandet har i løpet av kort tid opparbeidd seg sitt eige sterke uttrykk der improvisasjon og spontane innfall står i høgsetet. I september kjem debutplata på Odin Records, og bandet dreg på releaseturné, mellom anna til Kabuso!

Flukten er sett saman av musikarar som har gjort seg bemerka på den norske jazzscenen i band som Hanna Paulsberg Concept, Atomic, Moskus, GURLS, Wako, Espen Berg Trio, Skadedyr og Trondheim Jazzorkester.
Etter debutkonserten i juli 2020 skreiv anmeldarane blant anna:

«Musikken svever. Flukten flyr. Begeistringen i salen gir ekstranummer, og jeg for min del har allerede begynt å glede meg til album.»
– Arild R. Andersen for JazziNorge

«Om det er noen band-debuter som virkelig har satt merker i sjel og hjerte er det denne»
– Johan Hauknes for Salt peanuts

Lat deg sjarmera av unge talent frå Kvam kulturskule – laurdag 23. oktober kl 13!

To gongar i løpet av hausten 2021 byr kulturskulen inn til konsert i Kabuso – for å la deg og dine oppleva kva dei held på med.
Då kan du lena deg tilbake og høyra alt frå den vakraste song til den råaste gitarsoloen.
Du vil garantert bli både imponert, rørt og sjarmert – kakaokonsertane byr alltid på gode overraskingar!

Neste kakaokonsert blir laurdag 11. desember

Før og etter konserten kan du gjerne nyta kafélivet på huset – sjølvsagt med m.a. varm kakao og tilbehør på menyen.

NB! KabusoVen gjeld ikkje på kakaokonsertar då desse er ferdig rabatterte

Arr: Kvam kulturskule og Kabuso

Foto: Ung hardingfelespelar under Kakaokonsert

Bornas Kabuso viser den herlege filmen Alice i eventyrland. Lengd 1 time og 12 min. Etter filmen er borna velkomne til å teikne med oss.

Ein kanin spring hastande forbi ei halvslumrande Alice og peiker på klokka. Nysgjerrig spring Alice etter og havnar nedi eit kaninhull. No er det ingen veg tilbake. Ho er i Eventyrland, kor alt kan skje. Ei fantasifull historie med overraskande vendingar og vanvitige påfunn. Passar for barn mellom 5 og 99 år.

Bornas Kabuso er ein kunst- og filmklubb for alle born med kring 4 arrangement i halvåret.
Medlemsskap kostar 70 kroner, som gir gratis inngang til alle arrangementa i klubben.
Her viser me mellom anna animasjonsfilm og byr på kreative verkstadar.

Berit Opheim – song
Aasmund Kaldestad – song
Thor-Harald Johnsen – lutt, mandolin og sampling
Nils Økland – diverse feler
Mikko Perkola – viola da gamba

På programmet står engelske songar frå 1500 og 1600-tallet, av komponistane Henry Purcell, Thomas Champion og John Dowland, saman med balladar frå norsk seinmiddelalder.
Alt er tematisk bunde saman og handlar om undring og betraktningar omkring døden. Songane blei til i ei tid der menneska nok var omgitt av sjukdom, nød og død i større grad enn i vår moderne vestlege verd.

Her kan du reflektere rundt eige liv, og kring eigen død, eller det å miste nokon du hadde kjær. Korleis skal ein forhalde seg til døden? Kva kan refleksjonar rundt døden tilføre livet her og no? Kva kan desse gamle tekstane og melodiane gi oss i dag? Kanskje finst det ikkje noko svar på desse spørsmåla, men dei kan gje djupare meining til livet her og no.

Nokre av dei engelske songane er gjendikta til nynorsk av forfattaren Per Olav Kaldestad.
Programmet er sett saman i samarbeid med regissøren Tore Nysæther.

Om utøvarane:

Berit Opheim – song
Er frå Voss. Studert ved Bergen Musikkonservatorium og Norges Musikkhøgskole. Tilsett ved Ole Bull Akademiet som 1. amanuensis.
Er aktiv innan folkemusikk/samtidsmusikk/ tidleg barokkmusikk/middelaldermusikk/improvisasjon.
Stor aktivitet som soloutøvar og har urframført mange nyskrivne verk i ulike stilretningar m.a av Lasse Thoresen og Henrik Ødegaard.
Tidlegare medlem av Trio Mediæval og har samarbeidd med m.a. Rolf Lislevand, Bjørn Kjellemyr, Karl Seglem, Det Norske Solistkor og Grete Pedersen, Oslo Kammerkor, Kringkastingsorkeseteret, Tore Brunborg, Gabriel Fliflet, Sondre Bratland, Håkon Høgemo og Arve Henriksen.
Var Nattens Dronning og Papagena i folkeversjonen av Tryllefløyta 2005/2006.
Har vunne Landskappleiken fleire gongar.
Har deltatt på ca 45 cd-innspelingar.

Aasmund Kaldestad – song
Har jobba som frilanssongar sidan 2000.
Utdanninga i song tok han ved Musikkonservatoriet i Stavanger og The Royal Academy of Music i London. Sist under leiing av Ian Partridge med hovudvekt på tidleg engelsk musikk.
Han har jobba innanfor fleire musikalske sjangrar, til dømes som solist i førestellinga Die Massnahme med premiere under Festspillene i Bergen (2007) og Salzburger Festspiele (2008).
Han har medverka i over 200 show over heile landet, og vore engasjert som songar og skodespelar på Den Nationale Scene i Bergen to periodar frå 2000 og 2002.
Han har også turnért med programmet ”Shakespeare i ord og tonar” saman med forfattar Per Olav Kaldestad og luttenist Vegard Lund.
Aasmund har medverka i mange samanhengar både på scene, som plateartist og på fjernsyn.
Han har komponert musikk (ikke minst til teater/musikal) og turnert land og strand rundt både som soloartist og som ein del av trioen ‘Tenorane’.

Thor-Harald Johnsen – lutt, mandolin og sampling
Den norske lutenisten Thor-Harald Johnsen jobbar og bur for tida i Berlin.
Han studerte klassisk gitar ved Oslo musikkhøgskole, og utvikla sine musikalske ferdigheter på klassisk og elektrisk gitar og eit bredt spekter av
folkemusikkinstrument som charango, balalaika, banjo og mandolin.
I 2000 starta han å studere historiske instrument i Trossingen saman med Rolf Lislevand, som han sidan har jobba med mange konsertar og CD-innspillingar med (Alfabeto / Naïve 2001, Nuove Musiche / ECM 2006, Diminuito/ ECM 2010, etc.). I 2016 blei albumet Scaramanzia / Naïve tildelt Echo Klassikpreis.
For sine studier av det tyske lutrepertoaret på 1600-tallet fekk han et RWE-stipend.
Mellom 2013 og 2017 leia han forskningsprosjektet “How to grow a band” på Griegakademiet i
Bergen, finansiert av Norsk kulturråd og Bergen kommune.
Hans særs personlege spelestil og arrangementa hans kan ein oppleve på innspelingene Musica Boscareccia / Pan Classics 2015 og Concerto Stella Matutina CD Nuove Invenzioni / Sony Classical 2018.

Nils Økland – diverse feler
Har vore solist og samarbeidd med fleire orkester og ensemble, som Trio Mediæval, Engegårdkvartetten, BBC Consert Orchestra, Kringkastingsorkesteret, Christian
Wallumrød Ensemble, Oriental Winds of the Baroque ,Esbjerg Ensemble og Bergens Filharmoniske orkester.
Han har vore musikkleiar ved Ole Bull Akademiet 1989-1995, har ellers jobba som profesjonell frilansmusikar/komponist sidan 1985.
Han har motteke fleire prisar som Spellemannspris (1984), Rogaland Fylkes kulturpris 2010, Osaprisen 2010, Haugesund kommunes kulturpris 2011.
Han har også hatt fleire bestillingsverk for teater, og fleire konsertar i Europa, USA, Midt-Austen og Asia.

Mikko Perkola – viola da gamba
Har studert Vialo da Gamba ved Päijät-Häme konservatoriet, Sibelius-akademiet og ved det Kongelige konservatoriet i Haag.
Han har utøvd og spelt inn kammermusikk fleire stader i verda, og hans innspelingar av Bach sine gambe-sonater (Naxos 2008)
med Aapo Hakkinen, og Couperin´s gama suites (Naxos 2011) har blitt særleg godt mottatt.
Han har også vore medlem av det annerkjente engelskbaserte Phantasm, som har ført han frå Wigmore Hall i London til Hong Hong i 2017.
Perkola er ein allsidig musikar, og opptrer også i andre settingar enn tidleg musikk. Han har eit tett samarbeid med jazzsaxofonisten Jukka Perko, og konsertar med Quartet
Ajaton (Vokal, Moog synthezeiser, Bandeon og Viola da gamba).
Han har også jobba innan for teater som til dømes Det finske nasjonalteaterets og Lahti teateret

Tore Nysæther – regissør
Skodespelar, tekstforfattar og instruktør.
Han var engasjert ved Riksteateret 1983–86, deretter ved Den Nationale Scene i Bergen der han mellom anna framførte einpersonførestellinga Barrabas bygd på Pär Lagerkvist
sin roman. I seinare år har han medverka i produksjonar han har skrive, og regissert over 40 revyar, kabaretar og førestellingar, samt gjendikta Jaques Brel, Conor MacPherson med fleire.
I 2012 Skreiv han teksten til førestellinga «Veggen», med musikk av Karoline Krüger, som vant Heddaprisen for beste barneførestelling 2012.
Gjendiktet og dramatiserte suksessforestillingen «Rockeulven» for Den Nationale Scene i Bergen saman med Solrun Iversen, og A.O. Vinje-programmet ”På Geitevis” for Førdefestivalen i
2018.

Kabuso er glade for å kunne presentere denne tidlegare korona-avlyste konserten; fredag 12. november kl 19!

MARI KVIEN BRUNVOLL vokal, elektronikk
EVA PFITZENMAIER vokal, keys, fløyte
STEIN URHEIM gitar, effekter, langeleik
STEPHAN MEIDELL gitar, elektronikk
KIM ÅGE FURUHAUG trommer, perkusjon
ØYVIND HEGG-LUNDE trommer, perkusjon

Voice & Strings & Timpani var opprinneleg eit bestillingsverk til Nattjazz, som endeleg har vorte foreviga i studio.
Musikken befinner seg på ein dogmefri stad kor synthar, franske gloser og draumedryssande gitarar dansar taktfast i ring på samtidsmusikkfest.

I november 2020 kom albumet “Voice & Strings & Timpani” på det velrenommerte selskapet Hubro til særs gode kritkkar.

All musikk er komponert av Stephan Meidell og Øyvind Hegg-Lunde, begge kjende frå blant anna Erlend Apneseth Trio og Building Instrument.
Dei har i ei årrekkje jobba saman i duokonstellasjonen Strings & Timpani, og denne gongen utvidar dei formatet med nokre av sine favorittmusikantar frå den eigenarta improvisasjonsscenen i Bergen.

Sjekk ut VST på YouTube: 

Hald av sundag 14. oktober kl 14 for gode jazzopplevingar og balsam for sjela – ein av våre favoritttrioar kjem tilbake i Kabuso!

Kjetil A. Mulelid – piano
Bjørn Marius Hegge – kontrabass
Andreas Winther – trommer

Kjetil Mulelid Trio slapp debutplata si «Not Nearly Enough to Buy a House» i 2017 på det prestisjetunge norske plateselskapet Rune Grammofon.
Dei har sidan markert seg som nokre av dei fremste jazzmusikarane i Noreg, med aktiv konsertverksemd i større delar av Europa.
Det kritikarroste oppfølgar-albumet «What You Thought Was Home» vart utgjeve på same selskap i 2019. Albumet har gjort seg bemerka på straumetenester og har vorte hylla av media frå heile verda.

Trioen har vore svært positivt omtalt i magasin som The Wire og The New York City Jazz Record – og albumet vart omtalt som «Best of the year» på den britiske radiokanalen Jazz FM.
Dei tre medlemene er utan tvil nokre av dei mest interessante jazzmusikararne her til lands:
Pianist Kjetil Mulelid er kjend frå spananade prosjekt som Kjemilie og tidlegare nemnde Wako, medan trommeslagaren og bassisten er høvesvis nominert til/vinnar av Spellemansprisen gjennom andre prosjekt.

Saman dannar dei klassisk akustisk pianotrio med fokus på Mulelid sine energiske og harmonisk rike komposisjonar med vakre melodiar og komplekse rytmar. Trioen formidlar kjensla av ro og ein utfaldande tekstur og lydverd gjennom musikken sin. Samtidig presterar dei eit tett samspel kor improvisasjon tek musikken vidare til eit knutepunkt mellom dei tre musikarane sine ulike musikalske erfaringar.

Drop-in verkstad frå kl. 12-14 med tema skuggeteater.

Skuggeteater er fascinerande og gøy. Denne laurdagen skal me produsere eigne skuggeteaterfigurar som borna får testa i eit skuggeteater. Kanskje improviserer dei fram ei historie?
I tillegg vert me kjend med Kubbe som også prøver seg på å laga skuggeteater.

Bornas Kabuso er ein kunst- og filmklubb for alle born med kring 4 arrangement i halvåret.
Medlemsskap kostar 70 kroner, som gir gratis inngang til alle arrangementa i klubben.
Her viser me mellom anna animasjonsfilm og byr på kreative verkstadar.

Bugge Wesseltoft – piano, elektronika

Bugge kjem tilbake til Kabuso! Etter ei magisk musikalsk stund og fullt hus i fjor kan me sjå fram til ein ny førjulskonsert:
Den moderne juleklassikaren Its Snowing on My Piano svevar frå flygelet fredag 3. desember.

Bugge Wesseltoft er kjend for eit unikt musikalsk uttrykk innan nordisk moderne jazz og har hausta ei rekkje utmerkingar for dette. Han har samarbeidd med med storleikar som Jan Garbarek, Sidsel Endresen, Terje Rypdal, Nils Petter Molvaer og Jon Eberson. Vidare har han danna sitt eige innovative prosjekt kalla New Conception Of Jazz og platestudioet Jazzland Recordings.

Bugge fortel om historia bak albumet frå 1997:
«Snowing on my piano» vart laga ut frå eit ønske om ro og fred i jula, og ein pause frå stress, gåvehysteri og det å måtte vera så voldsomt lykkelig heile tida.
Som ung jobba eg ved eit akuttmottak på psykiatrisk sykehus og det var eit sjokk for meg å oppdaga at jula også er ei høgtid for depresjon, einsemd og vald i heimen.
Då eit tysk plateselskap spurde meg om å laga ei solopiano-plate med julesongar var eg sterkt i tvil, men valde til slutt å spela ho inn på vilkår av at eg fekk gjera det på min eigen måte.
Det å vera glad i kvarandre og ha tid til kvarandre er det viktigaste me kan driva med i jula.»

Sal av billettar frå onsdag 1. september kl 20.
Merk at kun eit redusert antal billettar er i sal, så her gjeld det å vera rask!

>>> Sjekk nettstaden til Bugge

Lat deg sjarmera av unge talent frå Kvam kulturskule – laurdag 11. desember kl 13!

To gongar i løpet av hausten 2021 byr kulturskulen inn til konsert i Kabuso – for å la deg og dine oppleva kva dei held på med.
Då kan du lena deg tilbake og høyra alt frå den vakraste song til den råaste gitarsoloen.
Du vil garantert bli både imponert, rørt og sjarmert – kakaokonsertane byr alltid på gode overraskingar!

Før og etter konserten kan du gjerne nyta kafélivet på huset – sjølvsagt med m.a. varm kakao og tilbehør på menyen.

NB! KabusoVen gjeld ikkje på kakaokonsertar då desse er ferdig rabatterte

Arr: Kvam kulturskule og Kabuso

Foto: Ung hardingfelespelar under Kakaokonsert

Det vert julefilm i år og: Polarekspressen (Lengd 1 t. 40 min. Aldersgrense 6 år).
Borna er velkomne til ein julete verkstadaktivitet etter filmen.

Om filmen:
På sjølvaste julekvelden ligg Chris i senga og tviheld på trua om at julenissen skal komma på ein gåverik visitt, då han plutseleg høyrer eit dundrande brøl. Utanfor på gata stansar eit skinnande, svart tog. Det er starten på den utrulege reisa til Nordpolen.

Bornas Kabuso er ein kunst- og filmklubb for alle born med kring 4 arrangement i halvåret.
Medlemsskap kostar 70 kroner, som gir gratis inngang til alle arrangementa i klubben.
Her viser me mellom anna animasjonsfilm og byr på kreative verkstadar.